Alcuentru col Comité d'Espertos de la Carta Europa de les Llingües Rexonales o Minoritaries

El pasáu 7 de xunetu del 2011 celebróse un alcuentru ente'l Comité d'Espertos que sigue'l cumplimientu o aplicación n'España de la Carta Europea de les Llingües Rexonales o Minoritaries, y una delegación d'Asturies. A la xunta, que se fizo na sé del Conseyu d'Europa en Madrid, asistieron, pel Comité d'Espertos, los Sres. Vesna Crnic-Grotic, Alberto López Basaguren y Gabor Kardos, presidiendo la Sra. Simone Klinge, del Secretariáu del Conseyu d'Europa. La delegación asturiana taba compuesta por los Sres. Ana María Cano, en representación de l'Academia de la Llingua Asturiana; Carlos Pulgar, pola Xunta pola Defensa de la Llingua Asturiana; Xurde Blanco, en nome de l'asociación Xuristes pol Asturianu; y Ramón d'Andrés, en representación de la Fundación "Caveda y Nava". Na reunión falóse del Tercer informe sobre'l cumplimientu n'España de la Carta Europea de les Llingües Rexonales o Minoritaries, ellaboráu pol Conseyu d'Europa pal periodu 2006-2009, onde hai esplícites referencies al tratu políticu y llegal de la llingua asturiana. En dates posteriores a esti alcuentru, la Fundación "Caveda y Nava" unvió al Comité d'Espertos un Informe a la Secretaría pa la Carta Europa de les Llingües Rexonales o Minoritaries del Conseyu d'Europa sobre la situación de la llingua asturiana na Comunidá Autónoma del Principáu d'Asturies (España). Esti informe pue consultase nesta páxina web, nos documentos correspondientes al añu 2011.

Descargar PDF.